Urwego rw’Igihugu rushinzwe Ubugenzacyaha “RIB”, bwemeje ko ruri gukora iperereza kuri Ingabire Victoire, nyuma y’aho kuri uyu wa Gatandatu tariki 11 Gicurasi 2019, hacicikanye amakuru avuga ko Ingabire Victoire yatawe muri yombi, ubwo yitabiraga inama yari yitiriwe guhura n’abayoboke b’ishyaka rye FDU Inkingi muri Sun City Motel, ho mu Karere ka Kirehe, ariko abayitabiriye bo bakamushinja ko yaragamije gushakisha abayoboke no kubashishikariza kujya mu mutwe w’iterabwoba ugizwe n’ubwoko bumwe gusa.
Mbabazi Modeste, Umuvugizi w’Urwego rw’Igihugu rushinzwe Ubugenzacyaha, yatangaje ko kuva aya makuru akimenyekana, iperereza ryahise ritangira. Ati “Kuva bikimenyekana iperereza riri gukorwa.”
Umwe mu bantu 22 bari bitabiriye iriya nama Ingabire Victoire yari yateguye, yagize ati “Yatubwiye ko ashaka abanyamuryango b’ishyaka rye, ko yifuza ko natwe turijyamo tukanamufasha gushaka abandi bantu. Icyakora yaduhaye ibwiriza rimwe, ngo ntimuzane abatutsi kuko simbakunda, mwibande mu bahutu cyane cyane abahoze mu ngabo.”
Kuva Ingabire Victoire yafungurwa n’imbabazi za Perezida mu mwaka ushize wa 2018, muri uwo mwaka nyuma y’iminsi mike afunguwe mu kwezi k’Ukwakira nabwo RIB yakurikiranye ikibazo cye aho yari amaze iminsi yumvikana mu itangazamakuru avuga ko yafunzwe ku mpamvu za politiki ndetse akagaragaza n’abandi benshi nk’imfungwa za politiki.
Iki gihe RIB yatangaje ko ibiganiro byabaye mu mwuka w’ubwumvikane busesuye, bikarangira Ingabire yemeye ko yiteguye gutanga umusanzu we mu mahoro mu iterambere ry’igihugu.
Ingabire Victoire akaba yongeye gukurikiranwa na RIB nyuma y’aho mu mwaka wa 2013 yari yarahawe igihano cy’igifungo cy’imyaka 15, nyuma yo guhamwa n’ibyaha byo kugambanira igihugu agamije kukibuza umudendezo no kurema umutwe w’abagizi ba nabi.
TUYISHIME Eric
